Nuwe era met stadion betree

Krieket Namibië het ’n mylpaal in die geskiedenis van die land aangeteken toe die eerste sooi vir die eerste nasionale krieketstadion Woensdagoggend gespit is.

Die nasionale krieketstadion verrys skuins aan die noordekant langs die Hage Geingob-rugbystadion in Olympia, en ’n klipgooi van die Onafhanklikheidstadion.

Die heel eerste bal van die Internasionale Krieketraad (ICC) se 16de o.19-Wêreldbeker sal vroeg in 2026 daar geboul word. Die junior wêreldskouspel word gesamentlik deur Namibië en Zimbabwe met 16 deelnemende lande aangebied.

Kort daarna bied Namibië saam met Suid-Afrika en Zimbabwe ook die 14de ICC Wêreldbeker 2027 in eendagkrieket aan. Verskeie van dié botsings sal by die stadion in Windhoek gespeel word om krieketliefhebbers, plaaslik en vanoor die wêreld, te bederf.

Afgesien van die krieketveld met agt kolfblaaie en pawiljoen met losies, sal die kompleks ’n hoëprestasiesentrum, restaurant, sportwinkel en naburige oefenveld met kolfblaaie en nette huisves.

Die spogstuk word nie net vir internasionale kompetisies opsy gesit nie. Klubkrieket behoort reeds vanaf komende September daar gespeel te word.

Dr. Rudie van Vuuren, president van Krieket Namibië, het in sy toespraak gesê: “ Eendag sal ons nabetragting oor ons lewens kan doen en die goeie herinneringe onthou. Vir sommiges sal dit vinnig gebeur, vir ander sal daar genoeg tyd wees.

“Die gesprek oor goeie herinneringe uit die verlede sal altyd begin met, ‘daai was darem ’n lekker dag’. Om vandag deel te wees van hierdie seremonie sal ons vir ons as raadslede van KN nie weer beskore wees nie.

“Wat ons vandag hier sien, is die fisiese gevolg van ’n kollektiewe visie wat sedert 2018 ontwikkel het. Vandag is vir my ’n lekker dag.

“Ons het gegaan en by die bestes in Indië en Suid-Afrika gaan leer en teruggekom en dit beter op die Namibiese manier kom doen. Ons nasionale krieketstadion is hier om internasionaal te kompeteer.

“In 2022 het wyle president Hage Geingob tydens ’n besoek aan Staatshuis aan ons KN-visepresident Polly Negongo gesê, ‘So, julle gaan wêreldbeker toe,’ en Polly het gesê, ‘Nee u eksellensie, ons gaan nie net Wêreldbeker toe nie, ons gaan om daar te kompeteer.”

“En dis die mentaliteit van ons krieketraad, dis ons vasberadenheid en visie. Ons sal altyd kompeterend wees. Nog voordat hierdie stadion gebou kan word, verower dit reeds internasionaal die prys vir die beste sonsondergange en beste braaiplekke.

“Die mense van Namibië is die grootste aandeelhouers in krieket in Namibië en is verantwoordelik vir ons sukses. Die hoekstene vir ons kultuur is uitnemendheid, dissipline, eenheid, kommunikasie, respek en deursigtigheid.

“Hierdie stadion sal meer as bloot ’n struktuur van staal en beton wees. Dit sal die hartklop van die Namibiese krieketgemeenskap word. ’n Plek waar drome gebore en gekweek word en krieketspelers hul talente kan uitstal en herinneringe in ons DNA ingeëts sal word. Hier sal vriendskappe gesmee word en die gees van kompeterendheid en uitnemendheid sal toeskouers vul.

“Kom ons breek die hindernisse af wat tussen ons, ons drome en aspirasies staan. Laat die stadion vir ons ’n simbool van ongekende moontlikhede van sukses wees.

“’n Spesiale woord van dank aan Johan Muller, uitvoerende beampte van Krieket Namibië, en sy span. Julle toewyding en passie vir dié projek sal ons altyddeur inspireer.

“Die eerste krieketbal van die 2027 Wêreldbeker sal hier waar ek staan voor ’n volgepakte stadion geboul word en die aankondiger sal sê, ‘Welkom by die Namibian Cricket Ground, beter bekend as die NCG. Laat die spel begin’.”



KONTRAKTE

In nog ’n deurbraak het Krieket Namibië terselfdertyd sy eerste kontrakte aan sy vrouespelers oorhandig om hul volwaardige professionele spelers te maak.

Johan Muller, uitvoerende hoof, het gesê: “Hierdie kontrakte stel ons in staat om die topspelers van die kus na Windhoek te trek waar hulle sal woon en werk. Nou kan al die vroue in die hoofstad hul sport van keuse beoefen sonder dat hul afwesigheid by die kus hulle benadeel.”